Fronte nazionala

Moderatzailea, bitartekaria… alegia, elkarrizketa baten lekukoa; hori da arazo guztia.

Hilabeteak dira Estatu mailako Alderdiek ez dutela politikarik egiten. Eskuinean dauden hirurak Katalunia eta Estatuko Gobernuen arteko elkar ulertzea baliatu ahal izango lukeen ‘figura’ hau proposatzearen aitzakia aprobetxatuz, manifestazioa deitu dute igande honetarako. Hori bai arduragabekeria!

Hilabeteak dira Estatu mailako Alderdiek muturreko adierazpen sutsuak egiten jarduten direla. Eskuinean dauden hirurak Pedro Sanchez Moncloatik ateratzea dute helburu eta beraien ‘tridentea’ Presidentea etengabe ziztatzea hartu dute egiteko bakartzat.

Oraingoan, komunikabide zein sare sozialetarako pozoiz beteriko hitzak alde batera utzi eta kaleetara eramango dute frontea: fronte nazionala. Ez da lehen aldia Alderdi Popularrak kalea astintzen duena; eskuin nazionalista espainiarra hirutan zatitu baino lehen egin zuen eta bere kimu berriekin ere egin du. Gogoratu, Altsasura elkarrekin joan zirela, orduan ere gori-gori dagoen herri batean gasolina isurtzen.

Baina igandean Madrilen izango den manifestazioa ez da edonolakoa: igandea ez da edozein igande. ‘Proces’ delako ekimenean aritutako politiko katalanen epaiketa hastear dagoen bezperatan egingo da. Justizia independentea omen da, euren esanetan, baina badaezpada ere, epaiketa hasi baino bi egun lehenago presioa sartu nahi dute Casadok, Riverak eta Abascalek.

Politiko katalanek ideia batzuk defendatu dituzte; ez dute besterik egin. Honek ezin du bestelakorik suposatu eta guk kalean nahi ditugu. Behin behineko kartzela zigorraren zama lotsagarria da. Baina momentu hauetan, zoritxarrez, Espainiako politika komunikabide eta sare sozialetan gauzatzen ari da. Hau benetan lotsagarria da. Moderazioa baino gehiegikeria nagusitzen ari da. Berdin zaie edozer gauza; marrazoak odola ikusten duenean eraso egiten duen moduan, eskuinak ikusten du Pedro Sanchez eta Alderdi Sozialista ahul daudela eta horretan ari da: erasoa, berriz ere hauteskundeetara deitzeko, orduan beraiek boterea izango dutelakoan.

Besteoi nazionalista deitzen digutenak, iraina izango balitz bezala, bandera gorri eta horiarekin bilduko dira beste behin (Una, grande y… ¡Una!), euren nazioaren aurka ari den etsaiari aurre egiteko prest; alegia, Sanchez jaunari.

Bitartean, CISek berriro azalduko du gizartearen kezka nagusiena enplegua dela…