Zenbaki begidunak

Joan den igande arratsaldeko 20:00etatik aurrera, zenbakien dantza etengabea izan da. Alderdi bakoitzak Kongresuan eta Senatuan lortutako ordezkariak, blokekako banaketak, gobernatzeko balizko akordioak egiteko aukerak, hainbateko igoerak edo jaitsierak, portzentajeak…

Batuketak eta kalkuluak luzatu egingo dira oraindik aste batzuetan; udal hauteskundeetara arte edo, behintzat, Moncloan Gobernua osatu arte. Ordura arte, lortutako ordezkaritzei ‘eserleku’ ere deituko diete behin baino gehiagotan Gorte Orokorretako arduradun izango garenen izen abizenei erreparatu ere egin gabe.

Gaurkoan, dena dela, datozenak baino joango direnak etorri zaizkit burura; azken urteotan Senatuko hemizikloan eta pasilloetan hainbatetan izandako senatariak edota haien laguntzaile eta aholkulariak. Batzuekin hurbiltasun ideologiko edo pertsonala izan dut; beste batzuekin, lehena edo bigarrena, bigarrena edo lehena; eta beste batzuekin ez bata ez bestea. Guztiak, halere, begiak eta aurpegiak dituzten pertsonak; biziak eta familiak. Batzuk euren lehengo lanpostuetara bueltatuko dira eta beste batzuk berriaren bila hasi beharko dira. Guztiei nire desiorik onena opa diet euren ibilbide berrian.

Amaierarako utzi ditut nire lankide izan direnak: hemizikloan, pasilloetan, bulegoan, baita ideologikoki zein pertsonalki hurbilen izan ditudanak ere. Beraien eginkizuna bikain bete ostean, Jose Mari Cazalis, Maria Eugenia Iparragirre eta Victoriano Gallastegi ez dira izango gure ordezkari Senatuan aurrerantzean. Ziur nago datozen kide berriek ere bikain beteko dituztela beraien ardurak, baina ziur nago, baita ere, faltan izango ditudala Kasuren umore zorrotza, Marujaren prestutasuna eta Victorianoren baikortasuna, beste ezaugarri askoren artean.

Orain arte, sei izan gara Senatuko Euskal Taldean eta aurrerantzean hamar izango gara. 6-3+7=10. Apirilaren 28ko hauteskundeen osteko eragiketak emaitza positiboa eman du baina tartean, kenketan kanpoan geratu diren zenbaki begidunak faltan botako ditut. Eskerrik asko eta animo!