Gernika oroimenean

Gaur apirilaren 26a da, Gernikako bonbardaketaren urteurrena. Urtero legez, 1937ko arratsalde hartan gertatutako sarraskia gogoratuko dugu penaz eta saminez. Batzuentzat bereziki mingarria izango da, duela 82 urte Gernikan izan zirelako zerutik jaurtitzen zituzten bonbei ihes egin nahian; familiarteko edota lagunak galdu zituztelako egun madarikatu hartan.

Behin baino gehiagotan eskatu dugu Senatuan Gernikako bonbardaketaren inguruan Estatuko informatzaile ofizialek jaurti zituzten gezurrei amaiera eman eta Estatuko egungo arduradunek Francok erasoan izan zuen erantzukizunagatik barkamenak eska ditzaten; hain zuzen ere, indarkeriaren beldurrarekin benetan gertatutakoa berrogei urtez isilarazi zuen Estatuko buruaren erantzukizunagatik. Duela bi urte Iñaki Oyarzabal izan zen –bai, Arabako Ahaldun Nagusia izan nahi duen PPko kidea- ezezkoa justifikatu zuena, gerra guztietan bando guztiek gezurra esan ohi dutela argudiatuz. Iaz Gernikako bonbardaketaren dimentsio historikoa aztertuko lukeen nazioarteko kongresua sortzeko egin nuen proposamenari ere uko egin zion PPk, bonbardaketak alde biek egin zituztela esanez.

82 urte igaro dira Gernikako bonbardaketa gertatu zela eta ez Francok –jakina-, ez PPko ezta PSOEko Gobernuek inoiz ez dute barkamenik eskatu nahi izan egun beltz hartan zerutik heriotza bota izanaren erantzulea lau hamarkadatan zehar Estatuko buru izan zen arren. Francorekin baino urte gehiago igaro dira Francorik gabe orduz geroztik, baina oraindik ez da horrelako keinurik eman.

Gaur apirilaren 26a da. 1937an zerutik jaurtitzen zituzten bonbei ihes egin zieten gernikar gero eta gutxiago dago bizirik. Askok ez dute aukerarik izan Estatu espainiarraren ahotik euren bihotzetan gordeta duten samina leunduko liekeen hitzik entzuteko; ea ez den beranduegi gutxi batzuek, behintzat, aurten ez bada laster, justizia egingo lukeen aitorpena jasotzeko.