Politikaren bolondresak

Gaur, maiatzak 10, berriz ere kanpainan sartu gara. Oraingoan, hiru erakunde berritzeko deitu gaituzte eta maiatzaren 26an hiru hautestontzi izango ditugu gure iritzia emateko: Europako Legebiltzarrerako ordezkariak, Foru Legebiltzarrerakoak eta Udaletako ordezkariak aukeratzeko.

Guztiak garrantzitsuak izanik ere, azken hauetan jarri nahi dut gaur arreta. Izan ere, nire ikuspuntutik, Udaletako lana da politikaren benetako boluntarioek egiten dutena. Gehienetan baldintza ekonomiko xumeetan edo, zuzenean, musutruk egiten direnak; norberaren denbora librea eskainiz herria eta herritarren alde lan egiteko egiten direnak; jarduera publikoari ekiteko aurrera pausoa ematen duten ia guztiek legez herritar askoren haserrea eta mesfidantza jasotzea eragiten dutenak.

520 Udalek agintari berriak izango dituzte hurrengo igandetik aurrera Euskal Herrian: 41 Araban, 89 Gipuzkoan, 112 Bizkaian eta 272 Nafarroan. Milaka lagun, bakoitzak bere herrian ahalik eta hoberen bizi dadin ahaleginean arituko direnak. Politika modurik altruistenean egiten duten emakume eta gizon hauek, nire iritziz, errekonozimendua behar dute; are gehiago gure jarduerak azken urteotan hain fama txarra hartu duenean, beraien denbora, lana eta jakituria eskaintzeko aurrera pausua eman dutenean.

Ni ere alkate izandakoa naiz eta lan horren gaziak ezagutu ditut, baina baita gozoak ere. Izan ere, oraindik pentsatzen dut, izan dudan ibilbide politiko guztian, Tolosako alkate izan nintzeneko garaiak izan zirela gehien bete nindutenak; bere gazi-gozo eta guzti. Herritarrekiko harreman zuzena; hartutako erabakien onurak bertatik bertara ikusi ahal izatea; gehienentzat txikikeria iruditu arren, sufritzen ari denaren arazoa konpondu ahal izatea; norbere herria hobetzen ari zarela ikustea… Hainbat eta hainbat dira, beraz, erantzukizun honetan jarduteak dituen sariak. Baita jende asko eta askoren esker ona ere.

Horregatik, alkate eta zinegotzi izan zaretenoi eta maiatzaren 26ko hauteskundeen ostean ardura horiek izateko ohorea izango duzuenoi, nire errekonozimendua eta eskerra!