Hauteskundeak eta 155. artikuluaren komodina

Hauteskunde usaina nabaritzen hasia nago! Maiatzaren 26a hurbiltzen ari da eta Alderdi Politikoak martxan dira: kandidaturak, ekitaldiak, proposamenak…

Ohituta nago, beraz prest ere, proposamen zentzudunak eta burutazio bitxiak entzuteko. Orain arte entzun dudan gauzarik harrigarriena atzo Extremadurako legebiltzarrean eztabaidatutako gaia izan da. PPk proposatuta eta PSOE eta Ciudadanosek babestuta, Katalunian Konstituzioaren 155. artikulua aplikatu dadila eskatzea onartu zuten.

Deigarria egin zait erkidego bat beste baten aurka inongo gupidarik gabe aritzea, baina deigarria hitza baino gehiago merezi duen sentsazio horretan PSOEren jarrerak harritu nau: Madrilen gauza bat esaten du eta Extremaduran beste bat; Fernandez Vara presidenteak ere gauza bat bozkatu zuen parlamentuan eta ostean “baldintzak emango balira” zehaztu du sareetan.

Eta hor dago gakoa: 155. artikulua aplikatzeko legea urratu behar da. Atzoko bozketan bere aplikazioaren alde azaldu ziren legebiltzarkideak erantzun dezakete Kataluniako Erakundeek zertan urratu duten legea horrelako neurri bat justifikatzeko? Ez, baina berdin zaie.

Onartutako ekimenean Kataluniako telebista autonomikoaren interbentzioa ere eskatu zuten. Jakin nahiko nuke atzo bozkatu zutenetatik zenbatek ikusi ote duten azkeneko hilabeteotan TV3eko minutu soil bat. Agian bai, internet sarea tren zerbitzua baino azkarragoa baldin badoa, behintzat.

Hauteskunde usaina dago eta Andaluziakoetan izan berri direnetan Kataluniaren gaia hauspotu zutenen emaitza onak ikusita aldameneko erkidegoko alderdi guztiak hasi dira, baita ere, berau boto-emaileen aurreko eskaparatean jartzen, norberaren benetako arazoak azpiko kajoietan ezkutatuz eta irtenbiderik eman gabe.

Gero Espainia gaizki doala: Ja! Okerrago ere joango da!