viernes, 1 de febrero de 2019

 

Politika eta espiritu santua

Gaur argia ikusi dut. Orain arte ulertezinak egiten zitzaizkidan hainbat gauza ulerterrazagoak egin zaizkit.

Ostiralero irakurtzen didazuenok jakin badakizue nik ez dudala atsegin hitz gordinak erabiltzea eta politikak gaur egun bizi duen iskanbilarekin herritarrei giro txarra helaraztea. Alderdi politiko askotako buruzagiek arazoei irtenbideak bilatzeko hartu beharko luketen denbora egunkarietan titular iraingarria edo sareetan txio erasokorra bilatzeko erabiltzen dute; txioak baino mokokadak izaten dira gehienak.

Asteon ikusi berri dugu Alderdi Popularrak kontuak eskatu dizkiola Estatuko Gobernuari lehen urratsak eman dituelako euskal eskuduntzak direnak behingoz aurrera eramateagatik. Meritxell Bateten agerraldia eskatzearekin batera, PPk adierazi du Pedro Sanchezen Gobernua Estatua deuseztatzen ari dela. Ene bada! Hasieran harritu ninduen, ez nuen ulertzen: Alderdi Popularraren leloa beti izan da “legea betetzea; eta legea gustukoa ez bada, aldatzea”. Garaiekin batera, halere, leloak ere aldatu egin dituzte, antza: “Legea bete… baina nire gustukoa denean”, ematen dute ulertzera.

Hasieran esan dizuedan moduan, gaur argia ikusi dut. Ameriketako Estatu Batuetako Presidentearen bozeramaileak ireki dizkit begiak. Sarah H. Sanders-ek esan berri du Donald Trump presidente dela “Jainkoak horrela erabaki duelako”. Duela ez hainbeste urte Estatu espainiarrean agintzen zuen beste batek ezarri zuen bezala, “Jainkoaren graziagatik”. Beno, euskaratzerakoan, ‘dohaina’ hitza erabiliko dut, ‘grazia’ gutxi egin zuelako berrogei urtetan zehar.

Agian, Alderdi Popularreko presidente berria ere Gorenak jarri du bere postuan, edo bere mezua heltzen zaio eta bere Legearen Taula propioak helarazi nahi dizkigu. Donald Trumpen inguruko azalpenarekin Nicolas Maduro etorri zait burura; Venezuelako presidenteari txoritxo batek hitz egiten omen dio eta Hugo Chavez komandantea omen da bere buruaren inguruan hegan dabilkiona. Beharbada, Pablo Casadori Aznar agertzen zaio kaio itxurarekin, edo aztore edo arrano irudia hartzen duen besteren bat, legea betetzearena beti ez dela hain beharrezkoa esaten diona.

Gaur argia ikusi dut.




No hay comentarios:

Publicar un comentario